Meðal þeirra þátta sem SamSTEM hópurinn var sérstaklega áhugasamur um að kanna í framhaldsskólaheimsóknunum var hver staða námsefnis í námi og kennslu væri. Almennt var niðurstaðan sú að þótt sumt efni þætti ágætt er víða pottur brotinn og mikill áhugi á bættu efni.
Hópurinn hefur greint þrjár meginleiðir til að vinna á þessu:
- að finna til efni sem þegar er til (t.a.m. efni sem kennarar hafa unnið í hjáverkum og notað án þess að gefa sérstaklega út) og birta miðlægt,
- að vinna nýtt efni í fögum sem auðvelt er að laga efni af háskólastigi að framhaldsskólastiginu, og
- að finna erlent efni til þýðingar.
Sá valkostur að vinna nýtt efni alveg frá grunni þykir óraunhæfur innan núverandi kerfis og í raun ókostur að styrkir til útgáfu námsefnis einskorðist við nýsamið efni í stað þýðinga.
Frá árinu 2017 hefur hópur unnið að þróun vefviðmótsins Edbook og efnis til birtingar á því. Nýtt tilvik viðmótsins hefur verið sett upp á samstem.github.io og þangað fært efni sem hentað getur á framhaldsskólastigi.