Sumarið 2026 stendur SamSTEM á nýjan leik fyrir námskeiðum fyrir kennara um aðferðir hugsandi skólastofu. Um er að ræða kennsluaðferð sem meðal annars felur í sér að nemendur leysa röð verkefna við hæfi í litlum slembivöldum hópum með áherslu á að nemendur hugsi og dýpki skilning sinn á viðfangsefnum kennslustundarinnar.
Námskeiðin eru einkum ætluð kennurum á háskólastigi og framhaldsskólastigi (af því að styrkur fyrir námskeiðin tengist þeim skólastigum) en grunnskólakennarar eru líka hvattir til að skrá sig og verður þá raðað í laus pláss eins og mögulegt er.
Innifalið í námskeiðinu er kaffi og kruðerí og hádegismatur. Aðgengi er fyrir hjólastóla. Þau sem nota heyrnartæki geta fengið nánari upplýsingar með því að senda tölvupóst. Námskeiðin eru kennd á ensku en þátttakendur geta talað íslensku sín á milli.
Haldin verða eftirfarandi námskeið og komast allt að 60 manns á hvert þeirra. Peter Liljedahl, prófessor í stærðfræðimenntun við Simon Fraser háskólann í Kanada, sem lagt hefur grunninn að rammanum um hugsandi skólastofu (e. Building Thinking Classrooms) kemur til landsins til að halda námskeiðin:
- Spurt & svarað fundur
- 25. maí (annan í hvítasunnu) kl. 13-16 í Sögu við Hagatorg
- Fyrir kennara sem notað hafa aðferðir hugsandi skólastofu og eru með spurningar til Peters eða umræðupunkta varðandi aðferðir hugsandi skólastofu
- Ókeypis
- Skráning hér fyrir spurt & svarað fund
- Tveggja daga inngangsámskeið
- 26.-27. maí kl. 9-16 báða dagana, með klukkutíma matarhléi
- Fyrir kennara sem hafa ekki áður sótt námskeið hjá Peter Liljedahl
- Kostar 5000 kr. (fimm þúsund krónur)
- Skráning hér fyrir inngangsnámskeið
- Eins dags framhaldsnámskeið
- 28. maí kl. 9-16, með klukkutíma matarhléi
- Fyrir kennara sem sótt hafa tveggja-daga grunnnámskeið Peters
- Kostar 3000 kr. (fimm þúsund krónur)
- Skráning hér fyrir framhaldsnámskeið
- Eins dags sérhæft námskeið fyrir kennara annarra faggreina en stærðfræði
- 29. maí kl. 9-16, með klukkutíma matarhléi
- Fyrir kennara sem vilja beita aðferðum hugsandi skólastofu í öðrum faggreinum en stærðfræði, svo sem náttúruvísindum, tungumálum, félagsvísindum, verkgreinum, …
- Kostar 3000 kr. (þrjú þúsund krónur)
- Skráning hér fyrir sérhæft námskeið annarra faggeina en stærðfræði
Spurt-og-svarað fundur mánudaginn 25. maí 2026
Heimsókn Peters mun hefjast með spurt-og-svarað fundi á annan í hvítasunnu með kennurum allra skólastiga sem reynslu hafa á aðferðum hugsandi skólastofu og vilja taka þátt í samtali um ákveðnar lausnir eða útfærslur á aðferðunum í því samhengi sem þau starfa í. Hér eru myndir frá sambærilegum fundi árið 2025, en þá mættu tæplega 30 kennarar af grunn-, framhalds- og háskólastigi. Boðið verður upp á kaffi og smá meðlæti.
Inngangsnámskeið 26.-27. maí 2026
Námskeiðinu er sérstaklega beint að háskóla- og framhaldsskólakennurum sem ekki hafa áður sótt námskeið Peter Liljedahl. Þó verður möguleiki fyrir grunnskólakennara að skrá sig og við munum bjóða þeim laus pláss eins og mögulegt er. Um er að ræða tveggja daga námskeið sem mun fara fram í Sögu við Hagatorg í Reykjavík í stofu sem hefur verið útfærð sérstaklega fyrir hugsandi skólastofu. Verkefnin á námskeiðinu tengjast stærðfræði en þess er gætt að kennarar allra faggreina geti tekið þátt óháð stærðfræðireynslu.
Hér að neðan eru myndir frá sambærilegu námskeiði sumarið 2025.
Framhaldsnámskeið 28. maí 2026
Námskeiðinu er sérstaklega beint að háskóla- og framhaldsskólakennurum sem hafa áður sótt námskeið Peter Liljedahl og notað aðferðir hugsandi skólastofu. Þó verður möguleiki fyrir grunnskólakennara að skrá sig og við munum bjóða þeim laus pláss eins og mögulegt er. Námskeiðið mun fara fram í Sögu við Hagatorg í Reykjavík í stofu sem hefur verið útfærð sérstaklega fyrir hugsandi skólastofu. Verkefnin á námskeiðinu tengjast stærðfræði en þess er gætt að kennarar allra faggreina geti tekið þátt óháð stærðfræðireynslu.
Hér að neðan eru myndir frá námskeiði sumarið 2025.
Sérhæft námskeið fyrir kennara annarra faggreina 29. maí 2026
Námskeiðinu er sérstaklega beint að háskóla- og framhaldsskólakennurum sem kenna aðrar faggreinar en stærðfræði og vilja beita aðferum hugsandi skólastofu til þess. Það mun fara fram í Sögu við Hagatorg í Reykjavík í stofu sem hefur verið útfærð sérstaklega fyrir hugsandi skólastofu.
Sem dæmi um aðlögun fyrir aðrar faggreinar má nefna það hvernig við veljum verkefni sem fá nemendur til að hugsa.
- Í tungumálakennslu gætu slík verkefni m.a. falið í sér greiningu texta eða skapandi skrif.
- Í samfélagsgreinakennslu gætu slík verkefni m.a. falið í sér að túlka sögulegar heimildir og taka þátt í rökræðum.
- Í náttúruvísindakennslu gætu slík verkefni m.a. falið í sér tilraunir og flokkunarverkefni.
- Í verkgreinakennslu gætu slík verkefni m.a. falið í sér hugmyndavinnu og þróun sem hluta af hönnunarferli.
Undirliggjandi grunnhugsun helst sú sama: Við viljum skapa lærdómsumhverfi sem fær nemendur til að taka virkan þátt, hugsa, rannsaka og leysa þrautir.