Hugtakið fjórða iðnbyltingin vísar til tækniframfara undanfarinna ára auk þeirra breytinga sem í vændum eru. Til að mæta þessum breytingum er nauðsynlegt að fjölga brautskráningum í svo kölluðum STEM greinum (vísindum, tækni, verkfræði og stærðfræði) en það er megin markmið þessa verkefnis. Svo það markmið náist þarf að laða fleiri nemendur að slíku námi en einnig að minnka brotthvarf nemenda úr námi. Þrír háskólar, HA, HÍ og HR, sem allir bjóða upp á nám í STEM greinum munu vinna saman að þessu mikilvæga markmiði.

Til að laða fleiri nemendur að námi í STEM greinum verður kynningarefni útbúið þar sem námi og áhugaverðum störfum í STEM greinum verður lýst. Að auki verður útbúið fræðsluefni sem mun auðvelda nemendum að átta sig á hvaða undirbúningur er nauðsynlegur stefni þau á slíkt nám. Til að vinna gegn brotthvarfi verður leitast við að kortleggja vandann og finna úrræði t.d. með breyttum kennsluháttum. Að auki verða netnámskeið í eðlisfræði, efnafræði, forritun, stærðfræði og tölfræði þróuð með það að markmiði að veita framhaldsskólanemum, hvar sem er á landinu, tækifæri til að undirbúa sig vel undir nám í STEM greinum. Þetta verður gert með virkri samvinnu framhalds- og háskólakennara.